Një tragjedi është regjistruar në futbollin amator shqiptar, në ndeshjen gjysmë-finale mes FC Dajtit dhe FC Lumninesen të kampionatit 9×9 të organizuar nga Federata Shqiptare e Futbollit.
Futbollisti i FC Dajtit, 28-vjeçari Bledar Hajdari ka humbur jetën, pasi ka pësuar atak kardiak gjatë ndeshjes që luhej në “Shtëpinë e Futbollit”, fushë pranë zyrave të FSHF-së.
Ai është dërguar me urgjencë në spitalin e Traumës, por pavarësisht tentativës së bluzave të bardha për ta rikthyer në jetë, fatkeqësisht nuk ia ka dalë dot që të mbijetojë. Sfida mes FC Dajtit dhe FC Lumninesen, mbrëmjen e së martës, është ndërprerë dhe braktisur pas ngjarjes së rëndë.
Kjo është tragjedi e përsëritur në futbollin shqiptar, pas rastit që ndodhi me futbollistin e Egnatias, Rafael Duamenën, në ndeshjen e Kategorisë Superiore kundër Partizanit.
Lidhur me tragjedinë, ka reaguar edhe Federata Shqiptare e Futbollit.
“Federata e Futbollit shpreh tronditjen e thellë për ngjarjen tragjike të ndodhur sot gjatë ndeshjes së vlefshme për gjysmëfinalet e kampionatit të futbollit amator 9×9 “FSHF Sunday League Albania”, FC Dajti-FC Lumninese në Shtëpinë e Futbollit .
Gjatë ndeshjes futbollisti i FC Dajtit, Bledar Hajdari, ka shfaqur probleme shëndetësore dhe është rrëzuar në fushën e lojës.
Menjëherë i është dhënë ndihma e shpejtë, duke e transportuar urgjentisht me ambulancën e pranishme në ndeshje për në spitalin e Traumës.
Për fat të keq, pavarësisht asistencës mjekësore dhe të gjitha përpjekjeve për ta rikthyer në jetë, futbollisti ka ndërruar jetë.
FSHF i shpreh ngushëllimet më të thella familjes Hajdari dhe ekipit të FC Dajtit për këtë humbje të madhe që ka shokuar të gjithë komunitetin e futbollit shqiptar.
Në këto momente të vështira, Federata Shqiptare e Futbollit qëndron pranë familjes, miqve dhe bashkëlojtarëve të Bledar Hajdarit, duke ndarë me ta pikëllimin për këtë ndarje të parakohshme dhe të rëndë.” – thuhet në reagimin e FSHF.
Discussion about this post