Tre anëtarë të një familje nga Gjilani i Kosovës ndërruan jetë në Shqipëri për shkak të helmimit nga ushqimi. Dy ndërruan jetë dje dhe i treti sot.
Viktimat janë Elfete, Afrim dhe Ferzinaze Haliti. Familja nga Kosova kishte ardhur në Gjirin e Lalzit dhe po qëndronin në shtëpinë e tyre me pushime prej disa ditësh.
Shkak i vdekjes dyshohet se kanë qenë kërpudhat, që po sipas të dhënave të para dyshohet se i kishin mbledhur në pyll dhe i kishin konsumuar në shtëpinë e tyre.
Pas problemeve të para shëndetësore tre anëtarët e familjes kishin shkuar në spital për mjekim dhe më pas ishin kthyer në banesë, por gjendja u agravua dhe fatkeqësisht ndërruan jetë.
Policia nuk ka bërë asnjë njoftim për rastin e rëndë, ndërsa janë proceduar në gjendje të lirë dy mjekët e spitalit të Durrësit që i kanë pritur për t’u dhënë ndihmën e parë. Sipas të dhënave, jo zyrtare mjekët po hetohen me akuzën e mjekimit të pakujdesshëm.
