Tragjedia e Himarës/ Meta zbulon pse nuk e shkarkon Rama Çuçin: Ka frikë se trembet…

Ish-presidenti dhe kryetari i Partisë së Lirisë, Ilir Meta disa momente pasi iu bashkua protestës së shoqërisë civile ku kërkohet drejtësi për vogëlushen Jonada Avdia, tha se ministri Çuçi duhet të jepte dorëheqjen që ditën e parë të tragjedisë.

Meta më tej, u shpreh se Rama nuk e bën “kokë turku” ministrin e Brendshëm, pasi ka frikë se ministrja Ibrahimaj nuk i firmos më për inceneratorët.

“Kam ardhur si qytetar, familjar, si prind duke iu bashkuar kësaj iniciative qytetare. Duhet të kishte ndodhur që ditën e parë dorëheqja e Bledi Çuçit. Për më tepër që kemi të bëjmë me një kuadër policie i cili është shkarkuar dhe është rikthyer në detyrë. Duhet të jepte dorëheqjen kryetari i bashkisë dhe ministri i Brendshëm.

Kryeministri nuk i shkarkon se ka frikë se i trembet ministrja e Financave dhe nuk i firmos për inceneratorët. Çdo dorëheqje do ishte një akt përgjegjshmërie. Kjo është një përpjekje për të marrë pak kohë, problemi i vendit është se drejtohet nga një kryeministër i papërgjegjshëm.Vetëm pak kohë më parë dy qytetarë u plagosën në Jalë, në rrethana të ngjashme dhe shumë aksidente të tjera. Asnjë masë nuk është marrë për të zbatuar ligjin, jo vetëm kaq por edhe cinizmi që thotë mos na e prisni imazhin e vendit me turizmin më të mirë në rajon. Zgjidhja është protesta, dorëheqja e gjithë ministrave përgjegjës dhe kryetarit të Bashkisë ku ka ndodhur ngjarja ose shkarkimi I tyre.
Qytetaret duhet të shumëfishojnë vrullin, intensitetin e protestës. Të vrasin frikën dhe të triumfojë liria. Familjet shqiptare janë në gjendjen më të rëndë nga ana ekonomike, nga problemet sociale, sa shumë të rinj të prekur nga fenomeni i drogës.
Të rrisim përgjegjësinë dhe të mblidhemi të gjithë, që kjo situatë papërgjegjshmërie të marrë fund dhe të mbrojmë fëmijët e shqiptareve dhe atdheun nga një klikë e papërgjegjshme”, tha ai.
Mjafton një dorëheqje e Edi Ramës dhe mendoj se çështja është më e thjeshtë, më mirë të kemi një dorëheqje se të kemi tre. Sepse edhe ata të tjerët, aty brenda janë.
Këtu kemi të bëjmë me një bandë, është e qartë. Kjo është ngjarje e përsëritur. Mjafton rasti i të riut Rasha, se si u vra, si mund të vritet një të ri, që shkon e blen cigare. Se si fabrikuan lajmet se ishte me armë.”-tha Meta.