Një ditë pas tragjedisë në kantierin e ndërtimit të magazinave në Lushnje, të plagosurit po lënë spitalin. Burime nga spitali i Lushnjes bëjnë të ditur se një 17 vjeçar është larguar drejt banesës së tij gjatë orëve të natës pasi mori mjekimin e nevojshëm. Ai kishte marrë lëndime sipërfaqësore ndaj mjekët e panë të arsyeshme që të largohej në shtëpi.
Tre të plagosurit e tjerë vazhdojne të jenë në vëzhgim por edhe ata pritet të lënë spitalin së shpejti. Gjithashtu konfirmohet nga mjekët në spitalin e Lushnjes se edhe të plagosurit e tjerë që po trajtohen në spitalin e Traumës janë jashtë rrezikut per jetën. Nga shpërthimi i ndodhur dje në Lushnjë mbetën të vrarë babë e bir, Roland dhe Elidon Hoxha.
Viktimat po drejtonin një vinç i cili kishte një depozitë oksigjeni pranë. Gjatë manovrave për të zhvendosur materialet e ndërtimit krahu i vinçit është përplasur me shtyllën e tensionit të lartë që ndodhet pranë këtij kompleksi dhe si pasojë ka shpërthyer depozita me oksigjen. Gjithsej në këtë incident mbetën të plagosur 7 persona.
Discussion about this post