Tragjedia në bregdetin e Durrësit, Rama vizitë ngushëllimi në familjen e Anri Kashikut

Kryeministri, Edi Rama, është nisur për ngushëllime drejt familjes së Anri Kashikut, 18-vjeçarit që u mbyt në plazhin e Durrësit gjatë një tentative fatale për të shpëtuar vëllain dhe një shok të vëllait të cilët po mbyteshin në det.

Ngjarja tragjike u regjistrua të enjten. Veç dhimbjes së familjareve e miqve, akti 18-vjeçarit është vlerësuar masivisht nga personalitete të ndryshme në reagimet e tyre.

Ngjarja

18-vjeçari hero Anri Kashiku humbi jetën ditën e djeshme teksa tentoi të shpëtojë vëllain dhe një shokun e tij që po rrezikonin të mbyteshin. Ai arriti të shpëtonte dy jetë, por vetë nuk mundi të dalë i gjallë në Bishtë Pallë të Durrësit. Mes lotësh, të afërmit dhe fqinjët shprehin ngushëllimet për ngjarjen e rëndë. Të shokuar nga ajo që ka ndodhur, ata vlerësojnë aktin e tij heroik, ndërsa luten që Zoti t’u japë forcë prindërve. Një fqinje e përshkruan atë si djalë të urtë dhe se këtë vit kishte mbaruar gjimnazin.