Tragjedia në Deçan, kryetari kërkon ndihmën e qytetarëve për kapjen e autorit

Nuk ka ende asnjë gjurmë nga autori për sulmin me kallashnikov që u mori jetën 3 personave mbrëmjen e djeshme në Deçan, mes të cilave edhe një nxënëse.

Sot, kryetari i Komunës së Deçanit, Bashkim Ramosaj ka reaguar sërish për tragjedinë në Gllogjan, ku u vranë tre persona dhe u plagos një tjetër.

Ai u ka shprehur ngushëllime familjeve, ndërsa iu lutet të gjithë qytetarët që kanë ndonjë informacion rreth këtij krimi makabër që të bashkëpunojnë më institucionet.

“Duke ju shprehur ngushëllime familjeve, lus të gjithë qytetarët që kanë ndonjë informacion rreth këtij krimi makabër, të bashkëpunojnë me institucionet relevante!”, ka shkruar Ramosaj.

Rasti i sulmit ndaj autobusit që transportonte nxënës nga Gjakova për në Deçan, ku u vranë tre persona dhe u plagos një, po hetohet nga Policia si “vrasje e rëndë”.