Ministrja e Turizmit Mirela Kumbaro ka reaguar për herë të parë pas tragjedisë së djeshme në Himarë, ku humbi jetën një 7-vjeçare. Sikur ka bërë deri më tani çdo pjesëtarë i qeverisë Rama edhe Kumbaro e ka deleguar vetëm tek autori i ngjarjes përgjegjësinë. Me anë të një postimi në Twitter, Kumbaro u shpreh se tragjedia e djeshme ka ndodhur për shkak të marrëzisë së një njeriu që theu çdo ligj, rregull e normë.
Ajo ka bërë thirrje që drejtësia të bëjë punën e saj pa kompromise, ndërsa ka shtuar se dënim maksimal duhet të jetë për këdo që thyen ligjet dhe rrezikon të shkaktojë humbje jete. Por, në asnjë moment nuk ka folur për përgjegjësit që ka ajo dhe personat e tjerë nën kompetenca për këtë ngjarje.
“Tejet e rëndë dhimbja për ngjarjen e kobshme në bregdetin e Himarës, ku një engjëll nuk është më mes nesh për shkak të marrëzisë së një njeriu që theu çdo ligj, çdo rregull e çdo normë me pasoja tragjikisht të pakthyeshme! Me vetëdijen se nuk ka fjalë të shërbejë sado pak si ngushëllim për prindërit, familjen për gjëmën që pësuan, kërkesa shkon për Drejtësinë që të bëjë punën e saj, pa asnjë kompromis, me dënim maksimal ndaj kujtdo që thyen ligjet e përbashkëta dhe rregullat dhe rrezikon të shkaktojë
humbje jete, në tokë a në ujë qoftë! Kërkesa shkon edhe për Policinë e Shtetit po ashtu, për çdo punonjës të saj në territor, që të jetë në lartësinë vigjiluese dhe ndëshkuese që uniforma i imponon për kryerjen e detyrës. Jonada e vogël u prehsh ne paqe”, ka shkruar Kumbaro.
Reagimi i ministres Kumbaro vjen ndërsa shoqëria civile ka paralajmëruar një protestë ditën e nesërme, ku do të kërkohet shkarkimi i Kumbaros, Gledis Nanos dhe Bledi Çuçit.
Discussion about this post