Janë zbardhur detaje të reja nga ngjarja e rëndë që ndodhi në Kanalin Anglez, ku 27 refugjatë humbën jetën pas fundosjes së gomones, ndërsa përpiqeshin që të arrinin në Britaninë e Madhe.
Mediat e huaja raportojnë se mes viktimave ishte gjithashtu një grua shtatzënë dhe 3 fëmijë. Viktimat ishin kryesisht kurdë, irakianë dhe somalianë të paidentifikuar deri më tani, të cilët kishin paguar deri në 6,000 paund secili.
Për ngjarjen e rëndë reaguan qeveritë franceze dhe britanike. Kryeministri anglez Boris Johnson i kërkoi Francës se nevojitet prezencë e forcave britanike në Francë në mënyrë që të parandalohen “vrasjet” e refugjatëve, por presidenti francez Emmanuel Macron nuk i ka dhënë përgjigje rreth këtij propozimi
Më tej, Macron kërkoi mbledhje të ministrave europianë për të reaguar pas kësaj tragjedie humanitare. Ai bisedoi në telefon me kryeministrin Johnson duke rënë dakord për thellim të bashkëpunimit kundër fenomenit të trafikut të refugjatëve që shfrytëzojnë kanalin franko-anglez.
Një ngjarje e ngjashme u shënua tetorin e kaluar, ku një familje me 5 persona kurdo-iraniane u mbytën në përpjekje për të shkuar drejt Britanisë së Madhe.
Discussion about this post