Tragjedia në plazhin e Kavajës, Berisha: Plotësisht e shmangshme

Ish-kryeministri Sali Berisha ka komentuar tragjedinë e sotme në plazh në Kavajë, ku babai dhe dy djemtë e mitur humbën jetën në det.

Berisha ka shpërndarë një video, ku qytetarë dhe dëshmitarë okularë kanë thënë se tragjedia ishte e shmangshme.

“Një tragjedi plotësisht e shmangshme!

Babai dhe dy djemtë mbyten në plazhin Vilë-Boshtë, një tragjedi e madhe për familjen dhe të afërmit e viktimave.

Autoritetet i kanë lënë shqiptarët në mëshirë të fatit. Policia e shtetit, ambulanca, rojet bregdetare kanë dështuar edhe sot, duke sjellë për rrjedhojë humbjen e tre jetëve.

Dëshmitë e plazhistëve të tjerë tregojnë se nëse autoritetet nuk do të mungonin, por do vepronin sipas detyrave përkatëse, viktimat do të ishin ende gjallë.

Shpreh ngushëllimet e mia të thella për familjarët e tre viktimave. Zoti ua lehtësoftë sadopak dhimbjen e pamasë”, shkruan Berisha.