Zëvendësministri i Shëndetësisë në Maqedoninë e Veriut, Ilir Hasani ka folur në lidhje me gjendjen shëndetësore të personave të lënduar nga zjarri në spitalin COVID në Tetovë.
Ai është shprehur se në total ishin 20 pacientë që kane qenë duke u trajtuar me Covid, ndërsa tha se gjendja e të lënduarve është stabilizuar.
“Gjendja e të lënduar është e stabilizuar, por nuk kemi informata ende të reja, deri tani ishim në terren dhe nuk kemi informacione. Mbi 20 pacient me COVID-19 kanë qenë duke u shëruar në bazë të evidencës tonë, por përderisa hetuesia dhe prokurori nuk mund të them asgjë”, tha ai.
Më herët ministri i Shëndetësisë, Venko Filipçe njoftoi se zyrtarisht ka 10 viktima nga tragjedia në Tetovë, por që numri i tyre mund të rritet.
“Në Tetovë ka ndodhur një fatkeqësi që ka marrë shumë jetë. Për momentin janë konfirmuar dhjetë të vdekur nga zjarri, por numri mund të rritet”, ka shkruar Filipçe në Twitter.
Mirëpo në media raportohet se numri i viktimave ka shkuar deri në 16. Ende nuk dihet se sa është numri i saktë mirëpo në vendgjarje janë grupi hetimor, familjarët e personave që dyshohet se kanë humbur jetën.
Ngjarja e rëndë ndodhi mbrëmjen e djeshme, ku spitali modulor që u përfshi nga flakët kishte gabime në ndërtim dhe nuk duhej të ishte vënë në përdorim.
