Një i ri 23-vjeçar humbi jetën në Athinë pasi u godit me thikë në qendrën e kryeqytetit grek. Viktima e identifikuar si Koço Myftari është transportuar në spital dhe është futur menjëherë në sallën e operacionit, por pa mundur të shpëtojë.
Policia ka nisur hetimet lidhur me ngjarjen, ndërsa ka marrë në pyetje miq të viktimës, të cilët edhe e transportuan drejt spitalit në një përpjekje për ti shpëtuar jetën.
Gjatë dëshmisë ata kanë identifikuar për autoritetet një person që besohet se ka vrarë 23-vjeçarin me thikë.
Në vitin 2019, Myftari kishte humbur të vëllanë, Ridjan Myftari, pas një konflikti mes emigrantësh në Gjermani, ku një shtetas afrikan e qëlloi me thikë.
23-vjeçari që mbeti viktimë mbrëmë, i kishte dedikuar disa rreshta vëllait pas ndarjes nga jeta të këtij të fundit duke thënë se ëndrrat e të vëllait tashmë i përkisnin atij, ndër të tjera.
“Ti ike udhës së pafundme, e tashmë vjen veç si vegim Ti nuk je as dhimbje as hidhërim sepse me një ëngjëll jo këto nuk kanë krahasim. Doja të thoja shkatërrim, por përsëri e përsëri asgjë nuk të zëvendëson dot o Ridi im. Dua të them diçka e diçka tjetër, por nuk mjaftojnë laps e një letër. E sikur njëmijë libra të shkruaj, nuk mund ta them dot sesa vuaj, Veç dije diçka o vëlla, se ëndrrat e tua tani më përkasin mua”, shprehej Koço Myftari për të vëllanë.
Discussion about this post