Një tjetër tragjedi ka ndodhur në SHBA dhe nxjerr në pah problemin e madh të posedimit të armëve. Këtë herë në Florida, ku një 9-vjeçar qëlloi dhe vrau një 6-vjeçar. Oficerët iu përgjigjën një shtëpie në Jacksonville, Florida rreth orës 03:00 të së hënës pas një raportimi se një person ishte qëlluar brenda shtëpisë.
“Hetimi fillestar përcaktoi se dy të miturit ishin brenda banesës nën kujdesin e një të rrituri. Njëri prej të miturve ka arritur të gjejë një armë zjarri dhe ka qëlluar vetëm me një të shtënë duke e goditur viktimën. Nuk ka të dhëna për dhunë kriminale”, tha shefi i policisë, Jay Dee Stronkow në një konferencë për shtyp.
Stronkow, i pyetur se si 9-vjeçari kishte akses në armën e zjarrit apo nëse ishte e siguruar, tha se hetimi ishte në fazat e hershme dhe ishte shumë herët për të përcaktuar të gjitha detajet. Ai tha se i rrituri i cili ishte në shtëpi me fëmijët është marrë në pyetje në kuadër të hetimeve që po kryhen për rastin.
6 vjeçari është dërguar në spital por ka ndërruar jetë si pasojë e plagëve të marra. Sipas Washington Post, bazuar në një analizë të të dhënave nga Qendrat për Kontrollin dhe Parandalimin e Sëmundjeve, armët e zjarrit ishin shkaku kryesor i vdekjes për fëmijët nën 18 vjeç në Shtetet e Bashkuara në 2020 dhe 2021.
Që nga viti 2015, deri në 4.6 milionë fëmijë në SHBA jetonin në shtëpi me të paktën një armë zjarri, sipas një studimi.
Discussion about this post