Një avion ushtarak është rrëzuar gjatë një misioni stërvitor në Kaliforninë Jugore. Si pasojë e aksidentit pesë marinsa amerikanë kanë humbur jetën, tha Korpusi i Marinsave në një deklaratë. Pesë marinsat ishin në një avion Osprey MV-22B kur ai u rrëzua në veri të kufirit meksikan në Kaliforni të mërkurën. Emrat dhe moshat e marinsave ende nuk janë publikuar. Avioni Osprey, i cili mund të ngrihet dhe të ulet si një helikopter dhe të fluturojë si një avion konvencional me krahë, ishte i dislokuar në Stacionin Ajror të Trupave Detare në Kampin Pendleton rreth 225 km në perëndim të Glamisit ku ndodhi incidenti.
“Jemi thellësisht të trishtuar për humbjen e marinsave tanë në këtë fatkeqësi tragjike. Zemrat tona janë me familjet dhe miqtë e tyre që përballen me këtë tragjedi.”, tha gjeneralmajori Bradford Gering.
Discussion about this post