Zinedine Zidane është gjithnjë e më pranë marrjes së drejtimit të kombëtares së Francës, ndërsa Federata Franceze e Futbollit (FFF) duket e gatshme të bëjë një përjashtim të rëndësishëm financiar për ta bindur legjendën franceze.
Sipas raportimeve, paga mujore e Zidane do të jetë më e lartë se kufiri aktual prej 450 mijë eurosh në muaj, që konsiderohet tavani maksimal për trajnerin e përfaqësueses franceze.
Për të finalizuar marrëveshjen, FFF pritet të miratojë një përjashtim të veçantë, duke vlerësuar statusin e jashtëzakonshëm të Zidane, sukseset e tij si trajner dhe ndikimin që ai ka në futbollin francez.
Ish-trajneri i Real Madridit shihet si kandidati favorit për të pasuar Didier Deschamps, i cili është në krye të “Les Bleus” që nga viti 2012 dhe e udhëhoqi Francën drejt triumfit në Kupën e Botës në vitin 2018.
Emërimi i Zidane do të përfaqësonte një epokë të re për kombëtaren franceze dhe një nga lëvizjet më të bujshme në historinë e saj.
Pritshmëritë janë të mëdha, pasi “Zizou” ka dëshmuar aftësitë e tij në pankinë me sukseset e arritura te Real Madridi, ku fitoi trofe të shumtë, përfshirë tri Liga të Kampionëve radhazi.
Nëse marrëveshja finalizohet, Zidane do të marrë jo vetëm drejtimin e një prej kombëtareve më të forta në botë, por edhe një pagë rekord që do të reflektojë prestigjin dhe rëndësinë e tij në futbollin francez.
Discussion about this post