Ndeshja më interesante e javës së fundit në fazën e grupeve të Ligës së Kampioneve, pa dyshim do të jetë ajo mes Bajernit dhe Interit.
Edhe pse tashmë llogaritë e kualifikimit janë mbyllur, emrat e lojtarëve që do të zbresin në fushën e gjelbërt përbëjnë interes.
Fillimisht Vazoja C u prezantua si grupi i ferrit, aty ku Barcelona përbënte trinomin e paparashikueshëm se cila nga këto skuadra nuk do të vazhdonte rrugëtimin më tej.
Gjigantët nga Mynihu dhe zikaltrit e Inzagit e arritën misionin kualifikim, çka i ulë në njëfarë mënyre edhe pretendimet nga rezultati final.
Në konferencën për shtyp, strategu Nagelsman nuk ka dashur t’i japë rëndësi Champions-it dhe rivalit të sotëm, por ta zhvendosë fokusin drejt Bundesligës, ku pas çdo jave po zhvillohet një beteje e pazakontë mbi kreun mes Unionit kryesues dhe Bajernit në rolin e ndjekësit.
Në këto 10 vjet djemtë nga “Allianz Arena” nuk kanë hasur vështirësi të tilla dhe është ky faktor që i detyron të kryejnë detyrën e tyre në takimet direkte dhe të monitorojnë e shfrytëzojnë gabimet e rivalëve.
35-vjeçari, gjithashtu ka dashur të japë nota të larta optimizmi mbi gjendjen e yjeve, të cilët ende ndodhen jashtë për shkak dëmtimi. Fjala është për Tomas Mylerin dhe Manuel Nojerin.
Discussion about this post