Kombëtarja e Kosovës sfidon Gjeorgjinë në duelin e kësaj të martë e vlefshme për kualifikueset e kampionatit Botëror. Pas humbjes me Suedinë, Dardanët kërkojnë rikthimin tek fitorja. Trajneri zviceran Bernard Challandes analizoi këtë vigjilje teksa vlerësoi kundërshtarin.
“Në Suedi nuk bëmë një ndeshje të mirë dhe u ndëshkuam nga disa gabime tonat, të cilat i kemi evidentuar dhe do të punojmë që të mos i përsëritim. Unë nuk shoh asnjë problem për humbjen në Suedi, pasi atje u mposht edhe Spanja. Kosova është një përfaqësuese e re, që është rritur ndjeshëm në vitet e fundit.
Sigurisht që ne mund të marrim rezultat të mirë edhe ndaj skuadrave si Suedia, Sllovenia, Spanja, Greqia, etj., megjithatë nëse nuk ia dalim, nuk shoh asnjë dramë”, deklaroi trajneri.
Në lidhje me një largim të mundshëm nga drejtimi i skuadrës, Challandes u shpreh:
“Një trajner nga ndeshja në ndeshje mbijeton dhe nuk e di nëse do të vijojmë bashkëpunimin apo jo. Nuk mund të flas sot për dorëheqje, apo për shkarkim, pasi këtë e vendosin të tjerët.
Unë jam këtu prej tre vitesh e gjysmë dhe jam gati të vijoj punën e nisur, por nuk është momenti për të folur për të ardhmen. Ndalni kritikat dhe ndihmoni Kosovën. E ardhmja e saj do të jetë shumë e mirë edhe pa mua në stol, por ndihmojeni”, deklaroi tekniku zviceran.
