Trajneri i Kosovës, Franco Foda, është deklaruar për mediat para dy ndeshjeve që ‘Dardanët’ do t’i zhvillojnë ndaj Rumanisë dhe Qipros në kuadër të Ligës së Kombeve.
Fillimisht Kosova do të jetë luajë kundër Rumanisë në ‘Fadil Vokrri’ më datë 6 shtato,r ndërsa tri ditë më vonë (9 shtator) do të ndeshet me Qipron.
Foda tha se ekipi i Kosovës është në një formë jashtëzakonisht të mirë dhe se janë të motivuar për të arritur fitoren.
“Tanimë i kemi përfunduar miqësoret dhe po përgatitemi për edicionin e ri të Ligës së Kombeve. Të gjithë lojtarët janë në formë jashtëzakonisht të mirë. Për ndeshjen e parë në shtëpi jemi shumë të motivuar dhe të lumtur, prandaj do të bëjmë gjithçka që kundër Rumanisë të arrijmë fitore”, ka thënë fillimisht Foda.
Tekniku gjerman është shprehur i lumtur për faktin se në këto dy ndeshje do të ketë më shumë opsione për të zgjedhur në krahasim me ndeshjet e kaluara.
“Është jashtëzakonisht e mirë kur ke kaq shumë lojtarë në formë dhe ke mundësi të zgjedhësh. Në ndeshjet e kaluara nuk kemi shënuar aq shumë gola, por tani kemi në dispozicion lojtarë si Muriqi, Rrahmani, Zhegrova dhe Asllani. Ata kanë shënuar me skuadrat e tyre dhe shpresojmë që të shënojnë edhe me kombëtaren”, deklaroi ai.
Ai shtoi se qëllimi i tyre kryesor është që të fitojnë ndeshjen e parë dhe të renditen si lider në grup.
“Nuk e kemi si qëllim vetëm të jemi favorit, qëllimi më i rëndësishëm për ne është që ta fitojmë ndeshjen e parë. Sigurisht se objektivi ynë është të jemi favorit, t’i fitojmë ndeshjet dhe të jemi të parët në grup”, përfundoi timonieri i Kosovës.
Përveç Rumanisë dhe Qipros, në grupin ku bën pjesë Kosova gjendet edhe Lituania.
Discussion about this post