Trajneri i Kombëtares shqiptare, Rolando Maran, është shprehur optimist për të ardhmen e kuqezinjve, duke theksuar se skuadra ka potencial të madh dhe se prioriteti aktual mbetet Liga e Kombeve.
Në një intervistë për median gjermane “L’Unione Sarda German”, tekniku italian foli për zhvillimin e futbollit shqiptar, duke vlerësuar cilësinë e lojtarëve dhe përmirësimin e infrastrukturës sportive.
“Shqipëria ka disa futbollistë shumë interesantë, një pjesë e mirë e të cilëve aktivizohen në Serie A dhe Serie B. Mjafton të përmendim Gjimshitin, Ismajlin, Asllanin, Berishën, Shpendin dhe Sherrin. Përveç kësaj, shoh një rritje të dukshme edhe në aspektin e infrastrukturës, jo vetëm në qendrën stërvitore të Kombëtares, por edhe në Tiranë dhe në qytete të tjera”, deklaroi Maran.
I pyetur për objektivat e tij në krye të Shqipërisë, trajneri 63-vjeçar u shpreh se skuadra është e fokusuar te sfidat e Ligës së Kombeve.
“Për momentin, e gjithë vëmendja jonë është te Liga e Kombeve. Më pas do të vlerësojmë hapat e ardhshëm. Besoj se kemi ndërtuar një bazë të mirë dhe se mund të krijojmë identitetin tonë në arenën ndërkombëtare”, tha tekniku i kuqezinjve.
Discussion about this post