Lefter Koka dhe Vangjush Dako janë transferuar nga paraburgimi i Durrësit, atje ku ndodhen, ndërsa gjykohen për çështje dhe vepra të ndryshme penale në GJKKO, në atë të Lushnjes. Vendimi është marrë nga Drejtoria e Përgjithshme e Burgjeve.
Nga raportimet mësohet se ish-ministri i Mjedisit, Lefter Koka, dhe ish-kryebashkiaku i Durrësit, Vangjush Dako, janë transferuar ditën e sotme.
Sipas raportimeve, lëvizjet janë në kuadrin e transferimeve që po ndodhin në pothuajse të gjithë IEVP-të, veçanërisht pas ngjarjes së ndodhur në burgun e sigurisë së lartë në Peqin, ku një prej të dënuarve me burgim të përjetshëm vrau me armë zjarri një tjetër të dënuar.
Koka po gjykohet në GJKKO lidhur me aferën e inceneratorëve, ndërsa ai po akuzohet nga SPAK jo vetëm për inceneratorin e Fierit dhe Elbasanit, por edhe për atë të Tiranës.
Ndërkohë Vangjush Dako ka akuzat për shpërdorim detyre në dy raste, ndërsa sipas raportimeve ndaj tij po kryhet edhe një hetim pasuror.
Discussion about this post