Tre persona, të njohur si mjaft problematik, janë arrestuar ditën e sotme në qytetin e Durrësit, pasi po transportonin drogë. Policia informon se në pranga kanë përfunduar tre persona, të dënuar më parë për vepra të tilla kriminale.
Sipas të dhënave, në pranga janë vënë M. B., 35 vjeç, banues në Qerret, i dënuar më parë në Itali, për veprën penale “Prodhimi dhe shitja e lëndëve narkotike”; M. B., 55 vjeç, banues në Qerret, i dënuar më parë në Itali, për veprën penale “Prodhimi dhe shitja e lëndëve narkotike”; P. L., 57 vjeç, banues në Jubë, i dënuar më parë për vjedhje.
Këta persona janë kapur në flagrancë në fshatin Qerret, Durrës, duke transportuar me automjet, rreth 7 kilogramë lëndë narkotike të dyshuar cannabis sativa, me qëllim shitjen në qytetin e Durrësit.
Ndërkaq, bëhet me dije se në cilësinë e provës materiale u sekuestrua lënda narkotike, automjeti dhe tre aparate celulare. Ndërsa vazhdojnë hetimet për të zbuluar rrjetin në të cilin të arrestuarit bëjnë pjesë.
Discussion about this post