Transportonin emigrantë të paligjshëm, dy të arrestuar në Gjirokastër

Dy të rinj kanë rënë në prangat e policisë së Gjirokastrës pasi u kapën në flagrancë duke transportuar emigrantë të paligjshëm kundrejt pagesës.

Sipas njoftimit të policisë, në pranga ka rënë një 29-vjeçar banues në Sarandë, pasi në vendin e quajtur “Ura e Lumit”, Gjirokastër, u kap duke transportuar me një autotomjet tip “Volkswagen”, 3 emigrantë të paligjshëm nga vendet MENA, kundrejt fitimit.

Gjithashtu, në vijim të hetimeve u ndalua si bashkëpunëtor i dyshuar, A. N., 21 vjeç, banues po në Sarandë. Në cilësinë e provës materiale u sekuestruan automjeti, dy aparate celulare dhe një shumë parash.

Materialet në ngarkim të këtyre dy shtetasve i kaluan Prokurorisë pranë Gjykatës së Shkallës së Parë Gjirokastër, për veprën penale “Dhënia ndihmë për kalim të paligjshëm të kufirit”.