Një person u arrestua nga policia e Tiranës dhe bashkëpunëtori i tij sirian u shpall në kërkim lidhur me një skemë që kishin ngritur për kalimin ilegalisht të refugjatëve nga Lindja e Mesme, nga Shqipëria drejt BE-së.
Në pranga u vu H. L., 29 vjeç, banues në Durrës, për veprën penale “Ndihma për kalim të paligjshëm të kufijve” e kryer në bashkëpunim dhe u shpall në kërkim bashkëpunëtori i tij, sirian K. A., 40 vjeç, banues në Emiratet e Bashkuara Arabe.
Sipas hetimeve, personat në fjalë kanë bashkëpunuar dhe me persona të tjerë nga Emiratet e Bashkuara Arabe, siguronin ftesa fiktive për persona të ndryshëm të huaj kryesisht nga vende si Siria, Egjipti dhe shtete të tjera nga Lindja e Mesme për të ardhur në Shqipëri me justifikimin për qëllime turistike, të cilët më pas ju siguronin ndihmë për t’u larguar në mënyrë të jashtëligjshme nga vendi jonë drejt vendeve të BE-së.
Po ashtu, në hetim janë vënë edhe 7 të huaj, për veprën penale “Kalimi i paligjshëm i kufirit”, konkretisht: A. A., 33 vjeç; A. A., 38 vjeç; B. B., 28 vjeç; A. A., 34 vjeç; A. A., 52 vjeç; A. I., 54 vjeç; A. M., 39 vjeç.
Discussion about this post