Gjykata e Tiranës ka vlerësuar masën e sigurisë për 5 të ndaluarit që u arrestuan pasi strehonin dhe transportonin klandestinë në këmbin të fitimit.
Sipas burimeve për Gijotina.com, mësohet se është lënë në burg Rigers Vejsiu pasi ishte përsëritës, ndërsa për Sterjo Germenji, Anamaria Mihallari, Drita Shehu dhe Sanije Shehi, është lënë në fuqi masa “arrest shtëpie”.
Mësohet se, policia ka pasur informacion se një makinë nga Korça do të vinte në Tiranë me emigrantë të paligjshëm. Një furgon i policisë i ka ndjekur në Bradashesh, deri në një pikë të rrugës ku kanë takuar një tjetër person, në këtë moment ka ndërhyrë policia, ku janë gjetur 4 emigrantë të paligjshëm, ndërsa te makina e dytë janë gjetur çantat me rroba të emigrantëve.
Këta emigrantë strehoheshin në hostelin e Sanije Shehut, një hostel që është i njohur nga policia për shkak të referimeve të shumta për zhvillimin e aktivitetit të paligjshëm të akomodimit të këtyre emigrantëve.
Ajo çfarë është vënë re është se këta persona kanë akomoduar edhe shtetas që futeshin në Shqipëri në mënyrë të rregullt për t’i ndihmuar më pas të shkojnë në vende të BE dhe jo vetëm.
Sipas Prokurorisë, duket se nga shtetasit e huaj, është shfrytëzuar një hapësirë ligjore e krijuar nga qeveria për shtetasit nga Bangladeshi, që nëse janë rezident në Emiratet e Bashkuara, mund të futen në Shqipëri. Por jo vetëm nga Bangladeshi, duke ardhur në Shqipëri për të ndjekur linjën e trafikut të klandestinëve.
Prokuroria ka në duar një sërë komunikimesh telefonike, që implikojnë dy motrat Shehu, edhe me të afërm të tyre që lidhen edhe me agjenci turistike, për sigurimin dhe pagesa të vlerave monetare.
