Transportonte 18 emigrantë, shpallet në kërkim 20-vjeçari

Një person është shpallur në kërkim këtë të shtunë në Kukës, në kuadër të operacionit policor të koduar “Kalimashi”.

20-vjeçari F.L u pikas duke transportuar me automjet 18 emigrantë të paligjshëm nga Siria në drejtim të Morinës, me qëllim kalimin e paligjshëm të kufirit.

I riu, i cili po i transportonte sirianët kundrejt pagesës, nuk i është bindur urdhrit për të ndaluar, por është larguar me shpejtësi.

Ai ka braktisur automjetin dhe duke përfituar nga kushtet e errësirës, ka mundur të largohet.

Njoftimi i Policisë

Goditet një rast tjetër i transportimit të emigrantëve, me qëllim kalimin ilegal të kufirit.

Transportonte kundrejt pagesës, 18 emigrantë, shpallet në kërkim, në kuadër të operacionit “Kalimashi”, 20-vjeçari.

Sekuestrohet automjeti me të cilin kryhej transportimi.

Në orët e para të mëngjesit të sotëm, shërbimet policore të Njësisë për Sigurinë e autostradës “Milot-Morinë”, në aksin rrugor “Tuneli-Morinë”, i kanë bërë shenjë ndalimi automjetit tip fugon, të marrë me qira nga shtetasi F. L., me qëllim kryerjen e kontrollit.

Shtetasi F. L. nuk i është bindur urdhrit për të ndaluar, por është larguar me shpejtësi, ka braktisur automjetin dhe duke përfituar nga kushtet e errësirës, ka mundur të largohet.Gjatë kontrollit në këtë automjet, shërbimet e Policisë kanë konstatuar 18 emigrantë nga Siria, të cilët shtetasi F. L. po i transportonte kundrejt pagesës, në drejtim të Morinës, me qëllim kalimin e paligjshëm të kufirit.

Në kuadër të operacionit “Kalimashi”, specialistët e Seksionit për Hetimin e Trafiqeve të Paligjshme të DVP Kukës, shpallën në kërkim për veprat penale “Ndihma për kalim të paligjshëm të kufijve” dhe “Mosbindja ndaj urdhërit të punonjësit të policisë së rendit publik”, shtetasin F. L., 20 vjeç, banues në Shkodër.

Vijon puna intensive për kapjen e 20-vjeçarit dhe vënien e tij përpara përgjegjësisë penale.

Materialet procedurale i kaluan Prokurorisë pranë Gjykatës së Rrethit Gjyqësor Kukës, për veprime të mëtejshme.