Policia e Gjirokastrës ka arrestuar një 56-vjeçar pasi po transportonte 10 emigrantë të paligjshëm me makinë. Fillimisht në aksin nacional në qytetin e Tepelenës, policia i ka bërë shenjë ndalimi automjetit tip “Peugeot” me të cilin udhëtonte 56-vjeçari me inicialet M.K.
Ai nuk i është bindur urdhrit të policisë për të ndaluar dhe tentoi të largohej me shpejtësi. Policia iu vendos në ndjekje dhe në vendin e quajtur “Ura e Luftinjës”, bënë të mundur ndalimin e makinës dhe arrestimin e 56-vjeçarit.
Në makinën e tij, u gjetën 10 emigrantë të paligjshëm, të cilëve 56-vjeçari u kishte premtuar transportimin e tyre drejt vendeve të BE-së kundrejt pagesës.
Në cilësinë e provës materiale u sekuestruan automjeti dhe 2 aparate celulare. Materialet në ngarkim të shtetasit M. K. i kaluan Prokurorisë pranë Gjykatës së Shkallës së Parë Gjirokastër, për veprat penale “Dhënia ndihmë për kalim të paligjshëm të kufirit” dhe “Mosbindja ndaj urdhrit të punonjësit të policisë së rendit publik”.
Discussion about this post