Ertjan Pjetërgjokaj është 31-vjeçari që ka rënë në prangat e policisë të Lezhës, pasi është kapur duke transportuar 8 emigrantë të paligjshëm drejt vendeve të BE-së, kundrejt pagesës.
Gjithashtu, është shpallur në kërkim polici 18-vjeçar F.D., që kishte marrë me qira mjetin me të cilin po transportoheshin emigrantët e paligjshëm.
Sipas policisë, njësitë Operacionale të Autostradës Milot-Morinë, në bashkëpunim me strukturat e DVP Lezhë, pas informacioneve të marra në rrugë policore se me një automjet tip “Volkswagen” po transportoheshin emigrantë të paligjshëm drejt Kosovës, organizuan punën për lokalizimin dhe ndalimin e mjetit.
Pjetërgjokaj është arrestuar nga shërbimet e Njësisë së Autostradës Milot- Morinë, në Skuraj, Kurbin, duke transportuar me automjetin tip “Volkswagen”, të marrë me qira nga F. D., 8 emigrantë të paligjshëm, të cilëve iu kishin premtuar kalimin drejt vendeve të BE-së, kundrejt pagesës.
Materialet i kaluan Prokurorisë pranë Gjykatës së Shkallës së Parë Kurbin, për veprime të mëtejshme procedurale, për veprën penale “Ndihma për kalim të paligjshëm të kufijve”, e kryer në bashkëpunim.
