Një person është arrestuar nga policia e Korçës, pasi u kap duke transportuar pesë emigrantë të paligjshëm kundrejt pagesës.
Mësohet se, në vijim të operacionit të koduar “Perimetri”, u bë e mundur kapja dhe arrestimi në flagrancë i Q. Sh., 25 vjeç, banues në fshatin Bulgarec, Korçë.
Shërbimet e Policisë kanë konstatuar në afërsi të fshatit Gështenjas, Pogradec, të riun i cili ishte duke lëvizur me mjetin tip “Volkswagen” dhe i kanë bërë me shenjë që të ndalonte. Drejtuesi i mjetit, nuk iu është bindur urdhrit të tyre për të ndaluar dhe është larguar me shpejtësi, por pas ndjekjes është kapur dhe neutralizuar.
Gjatë kontrollit të ushtruar në mjet, u konstatuan 5 emigrantë të paligjshëm, të cilëve 25-vjeçari dyshohet se kundrejt shpërblimit 300 euro iu kishte premtuar kalimin drejt vendeve të BE-së. Materialet i kaluan Prokurorisë së Rrethit Gjyqësor Pogradec për veprime të mëtejshme.
