Dy persona kanë rënë në prangat e policisë së Korçës pasi transportonin emigrantë të paligjshëm, njëri prej të cilëve një efektiv i Gardës së Republikës.
Sipas policisë, është arrestuar Dritan Kurra, 50 vjeç, banues në Tiranë, me detyrë punonjës i Gardës së Republikës dhe Artur Markogjika, 59 vjeç, banues në Durrës.
Shërbimet e Policisë, kanë konstatuar në aksin rrugor Pogradec-Prrenjas, në dalje të qytetit të Pogradecit, mjetin tip “Chevrolet”, me drejtues D. K. dhe pasagjer A. M., me të cilin po transportonin 5 emigrantë të paligjshëm, që kundrejt shpërblimit iu kishin premtuar kalimin drejt vendeve të BE-së.
Gjithashtu, nga shërbimet e Policisë Rrugore, në aksin Korçë-Ersekë, u konstatua mjeti tip furgon i markës “Iveco”, drejtuesi i të cilit, nuk iu bind urdhrit të policisë për të ndaluar duke u larguar me shpejtësi e braktisur mjetin në afërsi të fshatit Drenovë, Korçë. Gjatë kontrollit të ushtruar në mjet, u konstatuan 40 emigrantë të paligjshëm të cilëve kundrejt shpërblimit iu ishte premtuar kalimi drejt vendeve të BE-së.
Në vijim të veprimeve hetimore të kryera specialistët për Hetimin e Narkotikëve dhe Trafiqeve të Paligjshme në DVP Korçë, bënë shpalljen në kërkim dhe po punojnë për kapjen e A. C., 35 vjeç, si autor i dyshuar i kësaj ngjarjeje.
Materialet i kaluan Prokurorive të Rretheve Gjyqësore Pogradec dhe Korçë për veprime të mëtejshme.
