Në kuadër të operacionit policor “Perimetri”, policia e Korçës ka arrestuar një person i cili u kap duke transportuar 68 emigrantë të paligjshëm.
Personi me inicialet E. K., 40 vjeç, banues në Gjirokastër, është pikasur nga shërbimet e policisë rrugore në aksin rrugor Pogradec-Qafë Thanë, në afërsi të fshatit Piskupat, Pogradec, duke transportuar me mjetin tip kamion të markës “Benz”, 68 emigrantë të paligjshëm.
Personi në fjalë u kishte premtuar kalim të sigurt emigrantëve drejt vendeve të BE-së, kundrejt shpërblimit prej 150 euro secilit. Në momentin e ndalimit, drejtuesi i mjetit ka tentuar të korruptojë me një kartëmonedhë 1000 lekë punonjësit e policisë, me qëllim shmangien e kontrollit.
Materialet i kaluan Prokurorisë së Rrethit Gjyqësor Pogradec për veprat penale “Ndihma për kalim të paligjshëm të kufijve” kryer në bashkëpunim dhe “Korrupsioni aktiv i personave që ushtrojnë funksione publike”.
