Tre anije luftarake të NATO-s zbarkojnë në Finlandë, ja çfarë po ndodh

Tre anije luftarake të NATO-s kanë mbërritur në portin jugperëndimor finlandez të Turkut për t’u trajnuar me marinën finlandeze.

Anijet do të stërviten me dy gjuetarë të minave nga flota bregdetare e Finlandës, është bërë me dije ditën e sotme në një deklaratë të bërë nga forcat mbrojtëse të Finlandës.

Gjithashtu në deklaratë bëhet me dije se stërvitja do të përgatisë anijet finlandeze për të marrë pjesë në forcat e reagimit të NATO-s.

“Stërvitja dy-ditore do të përgatisë anijet finlandeze për të marrë pjesë në forcat e reagimit të NATO-s dhe do të fokusohen në “kundërmasat e minave dhe punën në një kornizë shumëkombëshe”

Nga ana tjetër, kjo stërvitje vjen gjithashtu pasi Helsinki konsideron mundësinë e anëtarësimit në aleancën ushtarake mes tensioneve të shtuara me Rusinë fqinje.

Në fillim të këtij muaji, kryeministrja finlandeze, Sanna Marin, tha se vendi i saj do të merrte një vendim në javët e ardhshme nëse do t’i bashkohej NATO-s.

Vullnetin për t’u bashkuar me aleancën ushtarake të udhëhequr nga SHBA e ka shprehur gjithashtu edhe Suedia. Sakaq, Rusia ka paralajmëruar dy vendet se do të përballen me pasoja nëse bëhen pjesë e NATO-s.