Rreth orës 23:20 të mbrëmjes së djeshme, 41 vjeçarja A.Z dhe djali i saj A.Z 14 vjeç janë helmuar nga uji i pijshëm që kanë konsumuar brenda një lokali në Shkodër. Nëna dhe djali i saj kanë shkuar në spital për të marrë ndihmën mjekësore. Ndërkohë që të njëjtin shqetësim ka pasur edhe kamarieri i lokalit, 30 vjeçari i identifikuar si M.M.
41 vjeçarja dhe djali i saj janë transportuar drejt Tiranës ku do të marrin një trajtim më të specializuar për shqetësimet e krijuara pas helmimit nga uji i pijshëm. Dyshohet se në shishen e ujit që kanë konsumuar nënë e bir, ka pasur lëndë djegëse. Sipas mjekëve të spitalit të Shkodrës, në stomakun e tyre janë zbuluar djegie të cilat janë shkaktuar si pasojë e konsumit të ujit të kontaminuar.
Ndërkohë grupi hetimor, në bashkëpunim me Drejtorinë Rajonale të AKU-së, Shkodër, nën drejtimin e Prokurorisë, po heton për zbardhjen e rrethanave të ngjarjes.
Institucioni i Ujësjellësit dhe Kanalizimeve në Shkodër ka reaguar lidhur me helmimin e tre personave nga uji i pijshëm. Në reagimin e bërë thuhet se prokuroria dhe AKU po hetojnë për zbardhjen e plotë të ngjarjes.
Në njoftim UKSH siguron qytetarët për cilësinë e ujit.
“Ujësjellës Kanalizime Shkodër, në kuadër të transparencës dhe komunikimit me klientët e vet, sqaron opinionin publik lidhur me një lajm që është është shpërndarë minutat e fundit: Personat nënë e bir dhe një kamarier, janë intoksikuar pasi kanë konsumuar ujë të ambalazhuar nga një kompani. Kjo konfirmohet edhe nga Prokuroria dhe AKU që bashkarisht po punojnë për zbardhjen e plotë të rrethanave të ngjarjes. UK Shkodër siguron klientët për cilësinë e ujit, monitoruar periodikisht nga specialistë të Drejtorisë së Shendetit Publik Shkodër”- thuhet në njoftim.
Discussion about this post