Tre shqiptarë dhe një rumun u dënuan nga një Gjykatë në Mbretërinë e Bashkuar, si pjesë e një grupi që vepronte në fushën e trafikut të drogës.
Hetimi dhe më pas zbulimi i 3 shqiptarëve erdhi pasi agjentët ndoqën shtetasin rumun, Albert Nedelcu, i cili transportoi njësasi kokaine të pastërtisë së lartë me vlerë prej 42 mijë paund në qendër të qytetit.
Policia evidentoi Nedelcun duke shkëmbyer një çantë të mbushur me 25,000 £ në para për një kilogram kokainë në Church Road, Hove.
Oficerët e ndoqën Nedelcu në një stacion shërbimi ku e arrestuan dhe zbuluan para cash të fshehura në bagazhin e makinës së tij, një Hyundai.
Ai ishte mes katër personave të tjerë të dënuar të hënën për përfshirje në një bandë shqiptare të drogës në qytet. Një nga burrat tashmë ishte dëbuar dy herë nga Britania e Madhe.
Më pas policia bastisi një banesë në Palmeira Avenue Mansions, Church Road, Hove dhe një pronë tjetër në të njëjtën rrugë.
Nedelcu, 23 vjeç, pa adresë fikse, po bënte një dërgesë në Derbi, por duhej të priste tre ditë për një mekanik pasi automjeti i tij u prish, u tha në sallën e gjyqit.
Gjatë kësaj kohe atij iu afrua në një stacion shërbimi një “biznesmen” i cili i kërkoi të transportonte një çantë në Brighton me makinë, por jo të shikonte se çfarë kishte brenda.
Michael McAlinden, duke u mbrojtur, tha: “ai ishte i shqetësuar se mos i mbaronin paratë. Parkoi Hyundai-n dhe dikush hyri, mori çantën e cila kishte një kilogram kokainë. Nuk ka asnjë provë për përfshirjen e tij të mëparshme. Atij thjesht iu kërkua të bënte një detyrë”.
Nedelcu kishte punuar si shofer kamioni që kur ishte 18 vjeç dhe po fitonte para për t’i dërguar në familjen e tij në Rumani.
Ai u kap nga policia në një stacion shërbimi në A281 pranë Horsham më 19 qershor.
Nedelcu shkëmbeu kokainën me Andi Dema, 35 vjeç. Dema, pa adresë fikse, ishte dëbuar tashmë dy herë nga vendi në 2021 dhe 2016, por u vu nën “presion të konsiderueshëm nga njerëzit në Shqipëri për t’u kthyer” për të paguar borxhet e tij të pazgjidhura, u tha në gjykatë.
Dema u tha se kishte rreth 80,000 £ borxh ndaj njerëzve në vendin e tij.
Brian Shaw, duke mbrojtur Demën, tha: “ai u përfshi në tregtimin e drogës tre vjet më parë për shkak të borxheve që grumbulloi. Atij iu tha se mund të vinte në këtë vend për të fituar më shumë para duke bërë punë ndërtimi.
“Atij iu tha se e vetmja mënyrë se si mund të rriste shumën e fituar (për të shlyer borxhin e tij) ishte duke shpërndarë drogë. Ai është i shqetësuar për sigurinë e tij, djalin dhe gruan e tij”.
Ridison Nega, 25 vjeç, u pa gjithashtu në Hyundai dhe pasi konstatoi policinë hodhi një çantë me ID dhe sende që kishin të bënin me tregtimin e drogës në një kosh, u tha në gjykatë.
Një tjetër i përfshirë, Xhenaro Shehu, 20 vjeç, u kap në një banesë në Palmeira Avenue Mansions.
Andrew Stephens, duke mbrojtur Shehun, e përshkroi atë si një “rast të trishtuar” të një “një të riu të lindur në një familje të mirë në Shqipëri, i cili për shkak të situatave atje ndjen se dëshiron të bëjë diçka për të ndihmuar familjen e tij”.
Shehu erdhi në Mbretërinë e Bashkuar ilegalisht dhe i detyrohej paratë që e kishin futur në vend.
Të katër burrat u deklaruan fajtorë për furnizimin e një droge të kontrolluar të klasit A dhe posedim të pronës kriminale.
Dema, i cili kishte dy dënime të mëparshme për drogë, u dënua me pesë vjet e gjysmë burg.
Nega, nga Newmarket Road, Brighton dhe Nedelcu u dënuan të dy me katër vjet e gjysmë.
Shehu, nga Palmeira Avenue Mansions, u dënua me dy vjet e katër muaj burg.
Gjykatësi Regjistrues Tom Nicholson-Pratt tha se të gjithë burrat ka të ngjarë të dëbohen.
Discussion about this post