Vendet përreth Serbisë kanë mbyllur hapësirën e tyre ajrore për avionët e ministrit të Jashtëm rus Sergei Lavrov i cili pritej të vinte në Serbi, por vizita është anuluar.
Një burim i lartë i ministrisë së jashtme për agjencinë e lajmeve Interfax të dielën ka konfirmuar raportimet se Bullgaria, Maqedonia e Veriut dhe Mali i Zi, kishin mbyllur hapësirën e tyre ajrore për avionin, me të cilin do të udhëtonte shefi i diplomacisë ruse për në Beograd të hënën.
“Diplomacia jonë ende nuk e ka shpikur teleportimin”, tha burimi. Nuk ka asnjë koment nga ministria e jashtme ruse.
Të premten ministria e Jashtme ruse paralajmëroi se ministri Lavrov do të qëndrojë në Beograd me 6 dhe 7 qershor. Paralajmërimi pasoi dakordimin e presidentit serb, Aleksandar Vuçiç me presidentin rus Vladimir Putin, për një kontratë të re trevjeçare për furnizimin me gaz nga Rusia. Presidenti serb thotë se synon anëtarësimin e vendit të tij në Bashkimin Evropian, por me vite ka punuar për forcimin e lidhjeve me Rusinë.
Serbia, ka refuzuar deri tani t’u bashkohet sanksioneve perëndimore kundër Moskës për shkak të agresionit të saj në Ukrainë.
Discussion about this post