Tre të arrestuar dhe dy në kërkim për sherrin ku u qëllua me kallashnikov në Durrës (Emrat)

Një ditë pas sherrit të dhunshëm të ditës së djeshme në lagjen 18, policia e Durrësit ka bërë të ditur se ka arrestuar tre persona për këtë ngjarje, ndërkohë që dy të tjerë janë shpallur në kërkim.

Ndryshe nga dita e djeshme ku zyrtarë të policisë thanë se nuk ka pasur të shtëna me armë zjarri, në njoftimin e sotëm thuhet se një prej personave ka qëlluar me kallashnikov në ajër.

Kështu, në pranga shtetasit Gentian Zeneli, Jolanda Zeqiri dhe Spiro Shore,  ndërsa në kërkim shtetasit: Hamdi Llana dhe Klajdi Senko.

U konfliktuan me sende të forta dhe njëri prej tyre qëlloi me armë zjarri kallashnikov në ajër, ndërhyrja e  menjëhershme e Policisë parandaloi përshkallëzimin e konfliktit ndërmjet disa shtetasve.

Vihen në pranga 3 shtetas për  veprat penale ‘Veprime që pengojnë zbulimin e së vërtetës’ dhe Moskallëzimi i krimit’.

Shpallen në kërkim 2 shtetas  të cilët dyshohet se qëlluan me armë zjarri  dhe u konfliktuan me një 48-vjeçar.

Salla operative e Drejtorisë Vendore të Policisë Durrës, ka marrë njoftim  se në lagjen nr. 18, disa shtetas po konfliktoheshin me njëri – tjetrin dhe është qëlluar me armë zjarri. Pas marrjes së njoftimit, shërbimet e Policisë kanë shkuar menjëherë në adresën e dhënë me qëllim parandalimin e përshkallëzimit të konfliktit dhe arrestimin autorëve.

Shtetasit e përfshirë në konflikt të cilët dyshohet se kishin qëlluar me armë gjatë konfliktit, kur kanë konstatuar shërbimet e Policisë janë larguar me shpejtësi me një automjet, të cilët janë identifikuar dhe shpallur në kërkim dhe konkretisht shtetasit H. Ll., dhe K. S.

Në vijim të veprimeve hetimore, janë vënë në pranga shtetasit:

G. Z., 48 vjeç, banues në Durrës, për veprën penale ‘Moskallëzimi i krimit’.

S. Sh., 38 vjeç, banues në Durrës, për veprat penale ‘Veprime qe pengojnë zbulimin e se vërtetës’ dhe Moskallëzimi i krimit’.

J. Z., 26 vjeçe, banuese në Durrës, për veprën penale  ‘Veprime që pengojnë zbulimin e së vërtetës’.

Po nga veprimet ka rezultuar se shtetasit H. Ll., dhe K. S, të cilët janë shpallur në kërkim, janë konfliktuar për motive të dobëta me shtetasin G.Z, të cilin e kanë dëmtuar me sende të forta dhe gjatë konfliktit kanë qëlluar me armë zjarri në ajër për ta kanosur atë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.