Tre vite pas shpërthimit të inteligjencës artificiale gjeneruese (GenIA), shumica e CEO-ve thonë se e kuptojnë potencialin transformues të saj. Por vetëm një grup i vogël, edhe pse në rritje, po arrin të tregojë rezultate të prekshme.
Një sondazh i Oliver Wyman Forum dhe New York Stock Exchange tregon se 17% e kompanive amerikane me të ardhura mbi 1 miliard dollarë dhe 14% e kompanive europiane kanë raportuar kursime ose rritje të të ardhurave me të paktën 10% falë IA.
Këto kompani lidere nuk po presin më prova për fizibilitet, por po e përdorin IA për të transformuar modelet e biznesit, për të gjeneruar produkte e shërbime të reja dhe për t’u siguruar që punonjësit të fitojnë aftësitë e nevojshme. Ndryshe nga të tjerët, ato e trajtojnë IA si pjesë të strategjisë afatgjatë, jo si një pilot projekti.
Pothuaj gjysma e tyre e rendisin transformimin teknologjik si prioritet kryesor për krijimin e vlerës për aksionerët, ndërsa 70% e CEO-ve besojnë se IA do të ketë ndikimin më të madh në konkurrueshmëri gjatë dekadës së ardhshme. Megjithatë, edhe gjysma e tyre shprehin shqetësimin se nuk po lëvizin mjaftueshëm shpejt përballë konkurrencës.
Këto kompani fokusohen tek kthimi nga investimi: janë shtatë herë më të predispozuara sesa të tjerat të deklarojnë se nuk është herët për të matur ROI e inteligjencës artificiale, dhe gati 80% thonë se investimet kanë përmbushur ose tejkaluar pritshmëritë, kundrejt 28% të kompanive jo-lidere.
Një e treta prej tyre gjeneron mbi 20% të të ardhurave nga produkte dhe shërbime të fuqizuara me IA. Shembujt janë konkretë: një zinxhir restorantesh në Amerikën e Veriut uli kohën e punësimit nga 12 në katër ditë përmes një asistenti virtual me IA, që menaxhonte komunikimin me kandidatët, intervistat dhe ofertat në kohë reale.
Një tjetër element kyç është aftësia për të parë mundësi në kohë të pasigurta. Ndërsa shumë biznese reaguan duke grumbulluar stok gjatë krizës së zinxhirit të furnizimit në vitet 2020–21, një gjigant global i shitjeve me pakicë përdori IA për të parashikuar kërkesën e çdo produkti dhe zhvendosi stokun në ditë, jo javë. Rezultati ishte 30% më pak mungesa në rafte dhe inventar më i optimizuar.
Një rol vendimtar luajnë edhe punonjësit. Sipas raportit Future of Jobs 2025 të Forumit Ekonomik Botëror (WEF), deri në vitin 2030 rreth 39% e aftësive ekzistuese të punëtorëve do të jenë të transformuara.
Kompanitë lidere ofrojnë trajnim dhe mjete për përdorim praktik të IA, duke e integruar atë në punën e përditshme. Punonjësit e tyre janë dy herë më të prirur të kenë marrë trajnim formal dhe tre herë më shumë të përdorin IA çdo ditë.
Kjo sjell jo vetëm rritje produktiviteti, por edhe më shumë besim në të ardhmen e kompanisë dhe siguri në vendin e punës gjatë tranzicionit teknologjik.
Punonjësit që ndihen të sigurt janë më aktivë në testime, përmirësime procesesh dhe zgjidhje problemesh, ndërsa ata të pasigurt priren të presin udhëzime të qarta, duke e ngadalësuar ndryshimin.
Një kompani biofarmaceutike globale arriti që 80% e fuqisë punëtore të përdorte platformën e saj të brendshme ChatGPT brenda gjashtë muajsh, duke krijuar 750 “bashkëpunëtorë” virtualë për detyra specifike në më pak se tetë javë. Kjo i ka lejuar të shkurtojnë ciklet e provave klinike dhe punën rregullatore nga javë në ditë apo orë.
Edhe pse suksesi i hershëm nuk garanton fitoren përfundimtare, kompanitë që ecin të parat shndërrohen në laboratorë natyralë, duke kuptuar më shpejt çfarë funksionon dhe pse. Përparësitë e përbëra nga përdorimi i hershëm mund ta ngushtojnë shpejt hapësirën për ndjekësit ‘e vonuar’.
Discussion about this post