Kur duhen edhe 3 ditë të mbahet protesta e lajmëruar e opozitës të hënën më 22 dhjetor, kryetari i PD, Sali Berisha, ka vendosur të largojë Ervin Salianjin nga posti i drejtuesit politik në Njësinë 6 në Tiranë.
Ervin Salianji ka qenë aktiv në këtë njësi, veçanërisht në zonën e Kombinatit, ku takimet e zhvilluara nga ai me strukturat dhe simpatizantët e PD-së janë karakterizuar nga pjesëmarrje e gjerë dhe një angazhim i dukshëm i të rinjve.
Salianji kishte ndërtuar një komunikim të drejtpërdrejtë me bazën, duke u fokusuar te aktivizimi i të rinjve dhe riorganizimi i strukturave lokale.
Pikërisht ky angazhim është parë si një aset politik, në një kohë kur opozita kërkon të zgjerojë ndikimin e saj dhe të rikthejë besimin e elektoratit.
Por, Partia Demokratike mohon që Salianji të ketë pasur një detyrë të tillë, pasi sipas saj drejtues politik në kryeqytet gjatë fushatës për zgjedhjet e parakohshne për Bashkinë Tiranë ka qenë Belind Këlliçi, ndërsa ish-deputeti thjeshtë u delegua për fushatën në Njësinë 6.
Më tej selia blu sqaron se të deleguarit u tërhoqën pasi zgjedhjet e parakohshme për kryebashkiak të Tiranës nuk u zhvilluan. Sidoqoftë, ashtu si Berisha, edhe në reagimin e Partisë Demokratike thuhet se “Salianji me aktivitetin e Elbasanit të realizuar nga Suel Çela është vetëpërjashtuar”.
Nuk ka qenë drejtues politik. Drejtues politik në Tiranë ka qenë Belind Kellici. Ai ishte i deleguar për fushatën. Fushata u ndërpre dhe të deleguarit për fushatën i tërhoqëm. Por, siç e dini, Salianji me aktivitetin e Elbasanit të realizuar nga Suel Cela është vetëpërjashtuar”,- thuhet në reagimin e e PD-se.
Reagimi i Partisë Demokratike është kontradiktor me një deklaratë të bërë nga kryedemokrati më 4 dhjetor para Kuvendit, ku tha se Salianji është i ngarkuar të zhvillojë analizën elektorale të partisë në Kombinat, zonë që përfshihet në Njësinë numër 6.
Kjo masë e ndërmarrë ndaj Salianjit duket se është hapi i parë i planit të Berishës për të eliminuar politikisht brenda partisë ish-deputetin, pasi ky i fundit ka nisur takimet me demokratë të zhgënjyer, të irrituar e të lodhur nga lidershipi dhe kupola e PD-së. Deri më tani, Foltorja e Salianjit ka mbledhur simpatizantë dhe anëtarë të strukturave të Partisë Demokratike në Durrës, Gjirokastër dhe Elbasan.
gijotina.com/
Discussion about this post