Mjeku i njohur Tritan Kalo ka vijuar me këshillat për qytetarët që të kryejnë vaksinën dhe të mos nënvlerësojnë masat anti-Covid që janë vendosur nga Komiteti i Ekspertëve.
Në një postim në Facebook, Kalo shprehet se varianti Delta dhe të gjitha llojet e tjera janë përhapur shpejt ndaj kërkon që secili prej nesh të mbajë maskën, të ruajë distancën si dhe të vaksinohet.
“Shtimi i numrit të të sëmurëve në popullatën e gjerë sidomos në ata ende të pavaksinuar, mundet t’i vihet si barrë variantit Delta që po dominon tablonë epidemiologjike të Pandemisë së Sars-Cov2/Covid-19, por agresiviteti në ecurinë dhe në përfundimin fatal të shumë të sëmurëve këto javët e fundit, qartazi lidhet me “një rizgjim” të aktivitetit dhe lëndimeve të shkaktuara nga variantet e mëparshme të këtij virusi….KURRË nuk duhen nënvlerësuar MASAT e treguara të vlefshme ndër shekuj, në pakësimin e mundësisë së përhapjes së viruseve aerogenë MHD (Maskë në mjediset e mbyllura e të mbipopulluara, Higjenë personale e kolektive si dhe distancim fizik aty dhe kur është e mundshme të realizohet ai”.
Kalo gjithashtu, iu bëri thirrje kolegëve të tij të stafit mjekësor të bëjnë kujdes me sugjerimin e antibioticëve për të sëmurët me Covid.
“KUJDES kolegë mjekë apo farmacistë me përdorimin e parakohshëm ose të pavend të Antibiotikëve dhe Kortikoideve, shpesh në doza të larta dhe kohëzgjatje marramendëse”, tha ai.
Mjeku paralajmëron se vjeshta e vonë dhe dimri do “hedhin në tregun e virozave të stinës viruse të tjerë respiratorë sidomos viruset e gripit stinor, të cilët edhe ato do shkaktojnë jetëlëndimet”.
