Në përgjigje të një video të publikuar nga kreu i qeverisë mëngjesin e sotëm, me pamje nga pedonalja e Tepelenës, teksa kishte shkruar ‘Kalaja e rilindur’, deputeti i Partisë Demokratike, Tritan Shehu ka hedhur akuza në drejtim të kryeministrit Edi Rama se ka lënë në harresë Bashkinë e Tepelenës.
Shehu thotë se ajo nuk është Tepelena e vërtetë, duke sjell kushtet e spitalit, që sipas tij janë të mjerueshme dhe infrastrukturën e munguar. Deputeti i PD shkruan se linjat elektrike në këtë qytet janë që prej viteve 1970, ku sipas tij, kjo sjell edhe që një pjesë e fshatrave të mbesin pa drita në dimër.
“Spitali i Tepelenës është në një situatë mjerane. Linjat elektrike në të gjithë Tepelenën janë ato të viteve 1970. Prandaj pjesa më e madhe e zonave rurale Tepelene-Memaliaj gjatë dimrit me shumë janë pa energji elektrike se sa me atë. ‘Sukses’ i ri i Ramës ky me te cilin ai mund te mburret, se kështu se paku nuk do te preken nga ‘kriza energjetike’ e tij”, shkruan Shehu.
Ai gjithashtu thotë se niveli i papunësisë në Tepelenë është shumë i lartë. Sipas tij, Rama mburret më një Kala e pedonale të rindërtuar, por zonat Tepelena e Memaliaj po zbrazen nga të rinjtë që ikin për mundësi më të mira.
“Për të mos përmendur këtu papunësinë e thellë në Tepelenë e Memaliaj, të rinjtë që sorollaten tërë ditën kot, familjet pa asnjë të ardhur mbasi i është ndërpre edhe ajo asistencë, të sëmuret e braktisur, shpenzimet e mëdha te tyre për të mbijetuar nga COVID, mungesën e plotë të shpresës. Dhe Rama mburret me një pedonale ne Kala, ndërsa Tepelena e Memaliaj vetëm po zbrazen e shkretohen”, shkruan Shehu.
