Tritoli në servis, shihni momentin kur autorët e plasin dhe largohen me biçikletë (VIDEO)

Pamjet që shihni janë tek servisi në Liqenin e Thatë në  Tiranë ku dy persona ende të paidentifikuar vendosën një sasi tritoli.

Siç duket edhe nga pamjet autorët kanë qenë dy dhe të të veshur me të zeza e me maskë anti covid. Ata shihen teksa afrohen me biçikletë pranë servisit të makinave në zonën e Liqenit të Thatë në Tiranë dhe vendosin lëndën plasëse.

40 sekonda pasi mbërrijnë, njëri prej tyre afrohet në biznesin në pronësi të Ronaldo Petit dhe i vendos tritolin. Dy autorët largohen me shpejtësi prej andej, ndërsa lënda plasëse shpërthen pas disa sekondash. E gjithë skema ka ndodhur në 1 minutë.

Kujtojmë që ngjarja ndodhi rreth orës 04:35 minuta. Fatmirësisht, nga ngjarja nuk pati të dëmtuar në njerëz, por vetëm dëme material.

Për shkak të sasisë së vogël të tritolit të vendosur në servis, policia dyshon se është një formë kërcënimi për pronarin e biznesit.

Ronaldo Peti u mor në pyetje nga grupi hetimor. Ai u tha oficerëve të komisariatit numër 1 se lënda plasëse i është vendosur nga konkurrenca dhe se nuk ka konflikte me ndonjë person.

Por, policia dyshon se tritoli i është vendosur për shkak të disa konflikteve që Peti ka pasur kohët e fundit me disa nga banorët e zonës.