Një kukull e veshur me një fanellë të Vinicius Jr e varur nga një urë, pranë qendrës sportive të Real Madrid. Për të mos patur asnjë ngatërrese kishte edhe një pankartë “Madridi urren Realin”. Gjesti i turpshëm, i marrë përsipër nga grupi ultras “Frente Atletico”, ndezi më tej vigjiljen e derbit. Real e Atletico në fakt përplasen në cerekfinale të Copa del Rey. Tifozët Colchoneros janë ankuar për biletat e pakta në dispozicion, ndërsa Vinicius është në shënjestër të tyre për sjelljet në fushë.
Episodi, pavarësisht gjithçkaje, është për t’u kryqëzuar. Banderola që u shfaq në urë me fjalët “Madridi e urren Realin”, ishte e shëmtuar, por asgjë jashtëzakonisht e re. Por nën të ishte varur një kukull me fanellën e Vinicius Jr të Real Madrid. Slogani i atribuohet frontit më të nxehtë të tifozëve të Atletico Madrid.
PËRSE VINICIUS JR
Sulmuesi i Real Madrid ka tërhequr mbi vete kohët e fundit antipati të ndryshme. Pjesa më e madhe lidhen me qëndrimin e tij në fushë, i gjykuar si viktimizues sipas kritikëve të tij. Kjo në lidhje me fyerjet raciste të pësuar në stadiumet e ndryshme të La Liga.
Klubi Colchonero lëshoi një deklaratë ku dënoi incidentin, duke u distancuar nga episodi. E megjithatë Atletico Madrid nuk e përmendi kurrë Frente Atletico: “Ato janë mesazhe të neveritshme dhe të papranueshme. Rivaliteti me Real Madrid është maksimal, por edhe respekti gjithashtu”.
Discussion about this post