Një krim i rëndë ka tronditur Tropojën, ku një 45-vjeçar ka ekzekutuar një 49-vjeçar pas një sherri mes tyre. Ngjarja e rëndë ka ndodhur rreth orës 15.30 në Çerem, një fshat i thellë i Tropojës, i cili ndodhet në kufi me Kosovën, kur 45-vjeçari Altin Ismajlisufaj është konfliktuar me bashkëfshatarin Isat Gjoçaj, 49 vjeç. Gjatë konfliktit Ismajlisufaj ka nxjerrë pistoletën dhe ka qëlluar disa herë ndaj 49-vjeçarit, duke e lënë të vdekur në vend.
Menjëherë, bashkëfshatarët dhe familjarët kanë njoftuar policinë, ndërkohë që 45-vjeçari është larguar në mal, me qëllim për të kaluar në Kosovë. Burimet policore bënë me dije se pas njoftimit nga banorët e zonës, menjëherë kanë rrethuar zonën dhe shtëpinë e 45-vjeçarit. Gjatë kontrollit të ushtruar nga uniformat blu, 45-vjeçari është gjetur i fshehur në shtëpi, ku i është sekuestruar dhe një pistoletë TT, e cila dyshohet se është arma e krimit.
Në dëshminë paraprake mësohet se Ismajlisufaj ka deklaruar për oficerin e policisë gjyqësore se Isat Gjoçaj i kishte rrahur të birin. Megjithatë, policia tha se po heton për sqarimin e plotë të rrethanave të ngjarjes, që tronditën rrethin e Tropojës.
Ismajlisufaj punonte zjarrfikës në Shërbimin Zjarrfikës të Tropojës, por njëkohësisht administronte disa shtëpi druri, ku priste turistë nga zona të ndryshme.
