Fashat ngjitëse në duart e Donald Trumpit kanë tërhequr vëmendjen e gazetarëve dhe të publikut, e duket në mënyrë të pashmangshme, kanë nxitur pyetjet nëse pas tyre fshihet ndonjë problem shëndetësor i presidentit amerikan.
Edhe fotot më të fundit në një prej eventeve publike ku Trumpi mori pjesë, treguan dorën e tij të mbështjellë, dhe spekulimet në media e rrjetet sociale morën hov. Në një deklaratë për shtyp, zëdhënësja e Shtëpisë së Bardhë sqaroi situatën, duke këmbëngulur se presidenti është vazhdimisht duke përshëndetur dhe shtrënguar duart me shumë njerëz gjatë takimeve dhe aktiviteteve zyrtare. Kjo është, sipas saj, edhe arsyeja e pamjes së pazakontë.
Sipas Karoline Leavitt, ky kontakt i shpeshtë ka shkaktuar irritim dhe lodhje në dorën e presidentit, gjë që ka bërë të nevojshme vendosjen e fashave si masë mbrojtëse. Shtëpia e Bardhë jep vazhdimisht përditësime mbi shëndetin e Donald Trump, teksa kreu i administratës amerikane iu nënshtrua skanimit me rezonancë magnetike. Leavitt e nënvizoi se nuk ka asnjë arsye për shqetësim dhe se presidenti vazhdon detyrat pa asnjë pengesë.
79-vjeçari iu nënshtrua një skanimi me rezonancë magnetike (MRI) në muajin tetor, i cili u konfirmua nga mjeku i tij, Sean P Barbabella. Mjeku i Shtëpisë së Bardhë sqaroi më pas se imazhet kardiovaskulare dhe ato të barkut ishin “krejtësisht normale”.
Discussion about this post