Presidenti amerikan Donald Trump tha sot se ai “ndoshta” do të takohet me presidentin ukrainas Volodymyr Zelensky, javën e ardhshme.
Lidhur me vendndodhjen e takimit të mundshëm, Trump sugjeroi se mund të ishte në Uashington.
“Epo, unë nuk do të shkoj atje”, u tha ai gazetarëve në Shtëpinë e Bardhë, me sa duket duke iu referuar Kievit.
Ai gjithashtu tha se “ndoshta” do të fliste së shpejti me presidentin rus Vladimir Putin, por nuk dha një kornizë kohore.
“Unë do të doja që lufta të përfundojë për një arsye kryesore: Ata po vrasin kaq shumë njerëz”, tha ai, përpara se të vazhdonte të pohonte sërish se Putini nuk do ta kishte nisur luftën nëse ai do të ishte president.
Ai shprehu shqetësimin se Evropa po i siguron Ukrainës “shumë më pak para” sesa SHBA-ja, edhe pse lufta e nisur nga Rusia “prek Evropën shumë më tepër”.
Trump, i cili u kthye në Shtëpinë e Bardhë gati tre javë më parë, përmendi gjithashtu burimet natyrore të Ukrainës.
“Një nga gjërat që po shikojmë me presidentin Zelensky është siguria e aseteve ukrainase. Ata kanë pasuri nën tokë, tokë të rrallë dhe gjëra të tjera, por kryesisht tokë të rrallë”, tha Trump.
Discussion about this post