Presidenti i SHBA-së, Donald Trump shprehu gatishmërinë e tij për të vazhduar punën me Moskën mbi traktatin e reduktimit të armëve bërthamore, për të cilin presidenti rus Vladimir Putin kishte propozuar një zgjatje prej një viti, sipas “Reuters”.
Trump, tha dje se propozimi i presidentit rus Vladimir Putin për të ruajtur vullnetarisht kufizimet mbi armët bërthamore strategjike të dislokuara “tingëllonte si një ide e mirë”.
Muajin e kaluar, Putini sugjeroi ruajtjen vullnetarisht të kufizimeve që kufizojnë madhësinë e dy arsenaleve më të mëdha bërthamore në botë, të përcaktuara në marrëveshjen “New START” të vitit 2010, afati i të cilës përfundon në shkurt, nëse SHBA-ja binte dakord me propozimin.
“Mua më duket një ide e mirë”, u tha Trump gazetarëve ndërsa po largohej nga Shtëpia e Bardhë kur u pyet për propozimin.
Ky traktat synon të kufizojë armët bërthamore sulmuese të dislokuara nga të dy vendet, duke kërkuar që nivelet e raketave balistike ndërkontinentale, raketave balistike të lëshuara nga nëndetëset dhe kokave bërthamore të mbeten nën kufijtë e rënë dakord.
Në janar, presidenti amerikan shprehu dëshirën e tij për një “çarmatim” të negociuar me Moskën dhe Pekinin. Ai synon gjithashtu të ndërtojë një sistem gjigant amerikan të mbrojtjes, të quajtur “Golden Dome”.
Discussion about this post