SHBA-ja kanë njoftuar sanksione të reja që synojnë dy kompanitë më të mëdha të naftës në Rusi, në një përpjekje për të ushtruar presion mbi Moskën për të negociuar një marrëveshje paqeje në Ukrainë, sipas BBC.
Njoftimi erdhi një ditë pasi presidenti i SHBA-së, Donald Trump tha se takimi i planifikuar me homologun e tij rus, Vladimir Putin, në Budapest do të shtyhej për një kohë të pacaktuar.
“Sa herë që flas me presidentin rus Putin, zhvilloj biseda të mira dhe pastaj ato nuk të çojnë askund”, tha Trump.
Ndërsa ndikimi ekonomik në Rusi ka të ngjarë të jetë minimal, ai përfaqëson një ndryshim të madh në politikën e jashtme të Trump, pasi presidenti amerikan tha më herët se nuk do të vendoste sanksione derisa vendet evropiane të ndalonin së bleri naftë ruse.
Kremlini tha se Rusia ishte “imune” ndaj sanksioneve.
Trump ka kërcënuar vazhdimisht me masa më të ashpra kundër Moskës, por i ka shmangur ato deri më tani me shpresën e ndërmjetësimit të një marrëveshjeje paqeje në pushtimin 3-vjeçar e gjysmë.
Administrata e tij është përpjekur ta paraqesë SHBA-në si një ndërmjetëse disi neutrale midis dy vendeve ndërluftuese, pas disa vitesh mbështetjeje të plotë për Ukrainën nga paraardhësi i tij, Joe Biden.
Por, presidenti amerikan është bërë gjithnjë e më i zhgënjyer me Kremlinin për shkak të dështimit të tij për të ecur përpara me negociatat.
Sanksionet janë gjithashtu një masë që udhëheqësi i Ukrainës, Volodymyr Zelensky, ka kërkuar prej disa muajsh.
Ai tha se ato ishin një “sinjal i mirë” nga SHBA-ja, duke shtuar se armëpushim do të ishte i mundur nëse vendet e tjera ushtronin më shumë presion mbi Rusinë.
Trump kritikoi dje Putinin se nuk ishte serioz për të bërë paqe dhe tha se shpresonte që sanksionet do të nxisnin një progres në konflikt.
“Thjesht ndjeva se ishte koha. Pritëm shumë”, tha ai.
Ai e quajti paketën e sanksioneve “të jashtëzakonshme”, duke shtuar se shpresonte që ato të tërhiqeshin shpejt nëse Rusia pranonte të ndalonte luftën.
Sekretari i Departamentit Amerikan të Thesarit, Scott Bessent tha se sanksionet ishin të nevojshme për shkak të refuzimit të Putinit për t’i dhënë fund kësaj lufte të pakuptimtë.
Ai tha se kompanitë e naftës të prekura – Rosneft dhe Lukoil – financuan “makinerinë e luftës” të Kremlinit.
Nafta dhe gazi janë eksportet më të mëdha të Rusisë. Dy kompanitë ruse të naftës eksportojnë 3,1 milionë fuçi naftë në ditë.
“Rosneft” është përgjegjëse për gati gjysmën e të gjithë prodhimit rus të naftës, që përbën 6% të prodhimit global, sipas vlerësimeve të qeverisë së Britanisë së Madhe.
Ukraina, muajt e fundit ka shënjestruar rafineritë ruse të naftës dhe infrastrukturën energjetike – në një përpjekje për të dëmtuar ekonominë e saj.
Discussion about this post