Presidenti i zgjedhur i Shteteve të Bashkuara të Amerikës, Donald Trump, u ka bërë thirrje aleatëve të NATO-s të paguajnë pjesën që u takon ose ai mund ta largojë vendin e tij nga aleanca ushtarake.
Sipas presidentit republikan, vendet e Bashkimit Europian dhe Kanadaja nuk po mbajnë përgjegjësinë që u takon në lidhje me buxhetin ushtarak.
“Nëse ata i paguajnë faturat unë mendoj se po na trajton drejt dhe përgjigjja është që absolutisht do të jemi me NATO-n. Por nëse jo, absolutisht, absolutisht,” deklaroi Trump në një intervistë për rrjetin NBC, duke iu referuar tërheqjes nga Traktati i Atlantikut Verior.
Presidenti i zgjedhur amerikan gjithashtu i bëri thirrje Vladimir Putinit që të arrijë armëpushim të menjëhershëm me Ukrainën, për ta ndalur luftën gati trevjeçare në Europë.
Gjatë intervistës, Trump tha se SHBA-ja mund të pakësojë ndihmat ushtarake për Ukrainën.
Presidenti i zgjedhur dhe kreu i shtetit ukrainas, Volodymyr Zelenskyy, u takuan të shtunën në Paris me rastin e inaugurimit të Katedrales së restauruar të Notre Dame. Presidenti Emmanuel Macron tha se bisedimet ishin “konstruktive”, pa dhënë detaje të mëtejshme.
Rusia është përgjigjur përmes zëdhënësit të Kremlinit, Dmitry Peskov, se është e gatshme të bisedojë me Ukrainën nëse Zelenskyy e shfuqizon dekretin e nxjerrë në tetor 2022, që i bën të pamundura bisedimet me homologun rus Putin.
Discussion about this post