Trupi i biznesmenit ende në greminë, thirren forcat speciale

Trupi i biznesmenit Rruzhdi Hoxha vijon të jetë ende në vendin e ngjarjes ku dhe u gjet paraditen e kësaj të shtune.

Sipas informacioneve bëhet me dije se për shkak të terrenit të vështirë trupi ende nuk është nxjerrë për tu transportuar drejt morgut. Ai u gjet i mbuluar me gurë pikërisht në zonën e Dajtit.
Dyshohet se Hoxha është vrarë në vendin ku u gjet nga policia. Trupi i viktimës kishte filluar të dekompozohej, fakt ky që shtyn grupin e hetimit të dyshojë se ai është vrarë që natën kur është denoncuar i humbur. Në lidhje me këtë ngjarje është arrestuar Fredi Rrushi i cili akuzohet për zhdukjen e biznesmenit. Rrushi aktualisht është i vetmi i dyshuar si vrasës i Hoxhës.

Nuk dihet nëse ai ka vepruar i vetëm apo ka pasur bashkëpunëtorë të tjerë në kryerjen e krimit.

Fredi Rrushi në deklaratat e tij ka pohuar se është personi i fundit që e ka takuar biznesmenin, duke treguar se së bashku kanë qenë në shoqërinë e disa miqve. Më pas ai ka thënë se e çoi Hoxhën në zonën e Fushë Mëzesit e prej atij momenti nuk kanë pasur më kontakte.