Trupi i ish-presidentit Bujar Nishani mbërrin të martën në atdhe, ndërsa ceremonia dhe më pas përcjellja në banesën e fundit do të bëhet të enjten. Të afërm, miq e familjarë do t’i japin lamtumirën e fundit ish-presidentit Nishani, ditën e enjte në ceremoninë që do të zhvillohet në orën 10:00 te Pallati i Kongresëve.
Ish-kreu i Shtetit ndërroi jetë të shtunën e 28 majit në një spital në Gjermani ku ishte i shtruar prej një muaji. Situata shëndetësore e ish-kreut të shtetit u rëndua pas infektimit të tij me COVID-19 dy muaj më parë. Ai vuante nga një sëmundje autoimune në mëlçi dhe nuk arriti t’i tejkalojë pasojat që virusi famëkeq i ka lënë në organizëm.
Fillimisht, Nishani u shtrua në Senatorium dhe pas rehabilitimit të tij fillestar, ai u rikthye në spital për shkak se simptomat post-COVID e patën lënë me shenja pneumonie në mushkëri.
Bujar Nishani ishte 55 vjeç dhe ushtroi detyrën e Presidentit të Shqipërisë nga 24 korriku i vitit 2012 deri në 24 korrik të vitit 2017. Më herët ai kishte mbajtur poste të rëndësishme në qeveri, një ndër të cilave si ministër i Brendshëm.
Discussion about this post