Deputetë të PD-së, pjesë e grupimeve të drejtuar nga Sali Berisha dhe Gazment Bardhi, kanë dakordësuar qëndrimet edhe për mënyrën se si do të votojnë në seancat plenare në rastet e diskutimeve të projektligjeve apo nismave të Qeverisë.
Kështu përtej kërkesave që do të paraqesin për ngritjen e Komisioneve hetimore, në mbledhjen e sotme, deputetët e PD-së janë dakordësuar për të votuar kundër projektligjit “Për disa shtesa dhe ndryshime në ligjin nr. 8577, datë 10.2.2000, “Për organizimin dhe funksionimin e Gjykatës Kushtetuese të Republikës së Shqipërisë, të ndryshuar.
Në mbledhjen e Komisionit të Ligjeve, deputeti demokrat Oerd Bylykbashi argumentoi sepse ai mbante një qëndrim kundër, duke vënë theksin në hendekun e madh që krijohej mes hallkave në gjyqësor, duke rritur vetëm pagat e anëtarëve të Gjykatës Kushtetuese.
Sipas raportimeve, në mbledhjen e sotme të deputetëve të opozitës, është theksuar se nëse do të flitet për rritje pagash, atëherë duhet të reflektohen në të gjithë sistemin e drejtësisë.
Ndërkohë nisma e dytë për të cilën deputetët janë dakordësuar se do të votojnë kundër është projektligji “Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës Federale të Gjermanisë, për bashkëpunimin teknik 2022 për projektin “Ekonomia qarkulluese për zhvillimin e qëndrueshëm urban në Shqipëri”.
Sipas raportimeve, kundërshtia për këtë projektligj vjen pasi Qeveria Rama ka harxhuar miliona euro për mbetjet në aferat me inceneratorët.
Projektligji në fjalë parashikon një grant prej 6.5 mln euro që qeveria gjermane alokon për mbështetjen e instrumenteve që ndalojnë asgjësimin e mbetjeve organike që janë të pa trajtuara në landfille në përputhje me direktivën e BE-së për landfillet.
Discussion about this post