Një lëvizje të domosdoshme për opozitën, e ka cilësuar deputeti Ervin Salianji, tryezën e zhvilluar dje me pjesëmarrjen e 43 ligjvënësve opozitarë, mes të cilëve edhe Gazment Bardhi dhe Sali Berisha, që drejtojnë dy formacione deputetësh.
Salianji u shpreh se bashkimi është i moralshëm dhe shtoi se duhet për të rrëzuar qeverinë.
Në një intervistë për Abcnews, deputeti demokrat tha se do të ishte jolegjitime mos ulja e deputetëve që përfaqësojnë të njëjtën parti dhe jo bashkimi i tyre.
“Padiskutim që mungesën e legjitimitetit nuk e ka bashkimi, e ka mosbashkimi apo mos ulja me deputetë të cilët përfaqësojnë të njëjtën parti politike, përfaqësojnë të njëjtin elektorat dhe kanë dalë nga votat opozitare për të përfaqësuar popullin opozitar.
Ajo që e bën edhe të moralshme këtë lëvizje, është domosdoshmëria e Shqipërisë për të pasur opozitë, domosdoshmëria e Shqipërisë për të pasur balancë institicionale, dhe padiskutim, bashkim i forcave për të bërë të mundur largimin e qeverisë, pavarësisht ndasive, pavarësisht mendimeve të ndryshme që ka edhe brenda grupimit që u mblodh ditën e djeshme, pavarësisht qëndrimeve të ndryshme për çështje që dihen dhe janë publike tanimë, bashkimi për koordinimin e aksionit opozitar, bashkimi për të pasur të njëjtën agjendë opozitare, e bën jo vetëm të domosdoshme, por përbën një lajm të mirë për Shqipërinë, aktiviteti i djeshëm”, tha ai.
Discussion about this post